மகளாய் பிறப்பாய்!!!

மகளாய் பிறப்பாய், 

என் பெண்ணே உன்னைகாண.

மகளாய் பிறப்பாய், 

உன் புன்னகையில் பசியாற.

மகளாய் பிறப்பாய், 

என் மடியில் நீ உறங்கிட. 

மகளாய் பிறப்பாய், 

உன் மழலை சொல் கேட்டிட. 

மகளாய் பிறப்பாய், 

உன்னை என் மார்பில் வளர்த்திட.

மகளாய் பிறப்பாய், 

உன் பள்ளிப்பாடம் கேட்டிட.

மகளாய் பிறப்பாய், 

என் சாதனைகளுக்கு சாட்சியாய்.

மகளாய் பிறப்பாய், 

நீ பெண்ணாய் பூத்திட.

மகளாய் பிறப்பாய், 

உன்னை மனமேடையில்  ஆசிர்வதிக்க.

மகளாய் பிறப்பாய்,

நம் மனதோடு பேசிட.

மகளாய் பிறப்பாய், 

உன் குழந்தைகளை கொஞ்சிட.

மகளாய் பிறப்பாய்,

உன்னை சாதனை மங்கையாய் காண.

மகளாய் பிறப்பாய், 

எனக்கு இரு சொட்டு கண்ணீர்விட. 

மகளாய் பிறப்பாய், 

உன் மகனாக நான் பிறக்க. 

மகளாய் பிறப்பாய் மகளே!!!! 

- இராமகுரு ராதாகிருஷ்ணன்

நான் இருக்கிறேன்

நான் இருக்கிறேன் 

உன்னை சுமந்து உலகை சுற்றிவர 

நான் இருக்கிறேன்

சுற்றிவரும் உலகை உனக்கு சொந்தமாக

நான் இருக்கிறேன்

சொந்தங்கள் உன்னை சோர்வுற செய்தாலும்

நான் இருக்கிறேன்

சோர்வுற்ற உன்னை சிரிப்பூட்ட எழவைக்க 

நான் இருக்கிறேன்

ஏழ நினைக்கும் உனக்கு ஏணியாய்

நான் இருக்கிறேன்

ஏணிகளை கடந்து சாதனைகள் செய்திட 

நான் இருக்கிறேன்

சாதனைகளும் சர்வ சாதாரனமென நீ உறக்கசொல்ல !!! 

நான் இருக்கிறேன்....

- இராமகுரு ராதாகிருஷ்ணன்

நாயர் சாரே

ஞாயிறாய் இருந்த நாயர் சாரே,

எங்கள் ஞான குருவே நாயர் சாரே,

பிள்ளைப்போல் பார்த்தாய் நாயர் சாரே,

காட்டிய வழியே சென்றோம் நாயர் சாரே,

வழி எங்கும் துணைநின்றாய் நாயர் சாரே,

விழி நீரை துடைத்திட்டாய் நாயர் சாரே, 

வாழ்க்கையை கற்றுத் தந்தாய் நாயர் சாரே, 

பலர் இன்று வாழ்வதும் உன்னாலே நாயர் சாரே, 

பெற்ற பேரெல்லாம் உனதாகும் நாயர் சாரே, 

எங்களை விட்டு எங்கு சென்றாய் நாயர் சாரே, 

ஏக்கங்கள் தீரவில்லை நாயர் சாரே,

என்றாவது நீ வருவாயா நாயர் சாரே??? 

- இராமகுரு ராதாகிருஷ்ணன்

பதினெட்டு - ஈரொன்பது

பதினெட்டாம் படித்தொட்டு

பதினெட்டை நான் பாட,

பதினெண் கீழ்க்கணக்கில் பாடினார் பெரும்புலவர்.

பதினெண்யென்றால் ஜெயா (ஜெயம்),

பதினெட்டை கொண்ட

பதினெட்டு காலயுத்ததை

பதினெட்டாய் பாடினார் புலவர்.

பதினெட்டே நம்மேனி,

பதினெட்டு மலையாளும் 

பதினெட்டு சித்தர்கள் அருள

பதினெட்டை நான் பெற்றேன்

பதினெட்டில் நீ பிறந்ததாலோ !!!   

- இராமகுரு ராதாகிருஷ்ணன் 

ஆராரோ ஆரிரரோ

என் பிள்ளை கண்ணுறங்க ஆராரோ 

என் பாட்டுக்கு கண்ணுறங்க ஆராரோ 

நாளையும் நமதேன்று ஆராரோ

நல்ல நாளும் நமதேன்று ஆராரோ

கவலைகள் மறந்துறங்க ஆராரோ

கனவுகள் கண்டுறங்க ஆராரோ 

வலிகளை மறந்துறங்க ஆராரோ

வழியொன்று வருமென்றுறங்க ஆராரோ

சிறுப்பிள்ளைபோல் சிரித்துறங்க ஆராரோ

உலகம் உனதென்றுறங்க ஆராரோ

செல்வங்கள் பெரிதல்ல ஆராரோ

சேர்க்கும் சொந்தங்களே ஆராரோ

நான் இருக்க நீயுறங்க ஆராரோ

நீ இல்லாமல் நானெங்கு போவேனோ?! 

போனது போகட்டும் ஆரிரரோ 

என்றும் போர் குணம் வேண்டாம் ஆரிரரோ

வாழ்வதும் ஓர் வாழ்கை ஆரிரரோ

பிறர் வாழ விழலாம் ஆரிரரோ

சொத்துன்ன சுகமேன்ன ஆரிரரோ

சிரிப்புக்கு விலையுண்டா ஆரிரரோ

சித்திரம் பேசுமடீ ஆரிரரோ

என் சித்திரம் நீதானே ஆரிரரோ

பக்குவம் வேண்டுமடீ ஆரிரரோ

பாதுகாக்க பழகிக்கொள் ஆரிரரோ

சிக்கனம் சிறுமையல்ல ஆரிரரோ

சிந்திக்க மறக்காதே ஆரிரரோ

நீ இருக்க நானுறங்க ஆரிரரோ

நான் இருக்க நீ எங்கும் போவாயோ? 

- இராமகுரு ராதாகிருஷ்ணன்